तनहुँमा सोलारबाट पाँच मेगावाट बिजुली उत्पादन हुँदै, काम अन्तिम चरणमा

तनहुँको शुक्लागण्डकी नगरपालिका–५ बेलचौतारामा सोलारबाट चाँडै नै पाँच मेगावाट विद्य‌ुत उत्पादन हुने भएको छ । सोलार फार्म प्रालिले नेपालमा नै पहिलो पटक सोलारबाट विद्य‌ुत उत्पादनका लागि अनुमति लिएको र काम अन्तिम चरणमा पुगेको छ ।

पुर्वाधारको काम अन्तिम चरणमा पुगेकोले तीन महिना भित्र बिजुली उत्पादन गर्ने गरी तयारी भइरहेको प्रालिका निर्देशक मनकारी गुरुङले जानकारी दिनुभयो । ‘‘कोरोना भाइरसको सङक्रमणको कारणले अवरोध भएकोले केही समय ढिला भए पनि नेपाली नयाँ वर्षमा प्रयोग गर्न मिल्ने गरी विद्य‌ुत उत्पादन गर्ने गरी काम भइरहेको छ’’ गुरुङले भन्नुभयो ।

बेल चौतारास्थित भानुभक्त बहुमुखी क्याम्पस हाताभित्र निर्माण भईरहेको फार्ममा हालसम्म ७५ प्रतिशत काम सम्पन्न भइसकेको प्रालिले जनाएको छ । प्रालिका अनुसार उत्पादित पाँच मेगावाट विद्य‌ुत नेपाल विद्य‌ुत प्राधिकरणका राष्ट्रिय प्रसारण लाइनमा जडान गर्ने सहमति लिई काम थालिएको थियो । प्रालिको झरौटास्थित रहेको ट्रान्सफर्मरमा उत्पादित विजुली पु¥याएर सोलार बिजुलीको क्षेत्रमा नयाँ आयाम ल्याउने प्रा.लिले योजना बनाएको छ । गतवर्ष नै बिजुली उत्पादन गर्ने लक्ष्य रहेको भए तापनि कोभिडको सङ्क्रमणले काम प्रभावित हुदाँ निर्माणमा ढिलाइ भएको आयोजनाले जनाएको छ । आयोजना सञ्चालनका लागि क्याम्पससँग प्रालिले १०० रोपनी क्षेत्रमा फार्म स्थापना गरेको छ ।

चार वर्ष अघि नै क्याम्पससँग सम्झौता गरी कम्पनीले दुई वर्षअघि उक्त आयोजनाको संरचना निर्माण गर्न सुरु गरेको थियो । कोरोनाले आयोजना निर्माणमा ढिलाइ हुँदा लागत बढ्ने भएको छ । प्रति मेगावट करिव आठ करोड रुपैयाँ लागत लाग्ने अनुमान गरिएकोमा लागत थप गर्नु पर्ने अवस्था आएको आयोजनाले जनाएको छ । आयोजनाका अनुसार यस अघि ४० देखि ४५ करोड लागत अनुमान गरिएकोमा बढेर ५२ देखि ५५ करोड पुग्ने अनुमान छ ।

उत्पादित विद्य‌ुत नेपाल विद्य‌ुत प्राधिकरणले सात रुपियाँ ३० पैसामा प्रतियुनिटमा २५ वर्षसम्म खरिद गर्ने सम्झौता भएको आयोजनाका सेयर सदस्य तथा व्यवस्थापक हरिकुमार श्रेष्ठले जानकारी दिनुभयो । फार्ममा अहिले उक्त परिमाणमा विजुली उत्पादन गर्न १३ हजार ४ सय ९४ प्यानल राख्ने तयारी भइरहेको छ । दैनिक सरदर ६ घण्टा विद्य‌ुत उत्पादन हुने छ । प्रति घण्टा ५ हजार युनिटका दरले दैनिक ३० हजार युनिट उत्पादन हुने आयोजनाले जनाएको छ । आयोजनाबाट वार्षिक एक करोड नौ लाख यूनिट उत्पादन हुने अनुमान गरिएको छ । वार्षिक करिव आठ करोड रुपैयाँ विद्य‌ुतबाट आम्दानी हुने अनुमान गरिएको व्यवस्थापक श्रेष्ठले बताउनुभयो ।

सोलारको पाता राख्ने राख्ने स्थान तयार गरी केबुल बिच्छ्याउने कार्य भईरहेको गुरुङले जानकारी दिनुभयो । अर्थिङको काम भइरहेको छ । ट्रान्समिसन तयार भइसकेको छ, उनले भने, प्यानल आएपछि करिव २० दिनमा काम सकिनेछ । फार्मबाट उत्पादित बिजुली करिव ५ सय मिटर पर रहेको बेलचौतारा सबस्टेसनमा लगेर जोडिनेछ । भारतको रेनेर्गो डेभलोपर्स प्रालिले ४२ करोड रुपियाँमा सो सम्झौता गरेको आयोजनाले जनाएको छ ।